IM COOP
Es isch Sunnti u ds Käthi Habegger zieht grad es Pfung Bire über e Scanner ar Coopkasse. Welem Gigu isch äch die Idee vom Sunntigsverchouf cho? dänkt sie u luegt aus würd sie grad are grusige Salatsauce schmöcke. Scho unger dr Wuche schaffet sie nid gärn u de ersch am Sunnti. Abfahre, da. Mönsche het ds Käthi nie gärn gha u im Coop hets haut geng vo dene Cheibe. Me fragt sech itz, wieso ds so eini wie ds Käthi de überhoupt sone Job het, wo sie die ganz Zyt um Mönsche ume isch. Aber het sie e Wahu gha? Ohni Usbildig het se ds Coop gnädigerwys igsteut u im Lager cha sie wäg ihrem chronische Rüggeweh nid bügle, süsch wär sie scho lang dert. U itz hets se haut am Füdle u überau a ihrem Arbeitsplatz hets Mönsche, wo sech mit em Nötigschte oder däm, wo sie grad für z Nötigschte haute, idecke. Zum Bispiu wes 10fachi Superpünkt uf ds Mähu git, de wird gopferteli nomau Mähu gchouft, öb mes itz brucht oder nid. Houptsach me überchunnt d Superpünkt u cha sech när au 3 Jahr es Päckli Kambly-Güetzi für nes Füfzgi weniger choufe. Ds Superpunktsystem het ds Käthi einewäg scho geng ufgregt. Wüu obwohu ds d Chunde uf die Superpünkt spitz si, wie ne junge Hung im Früehlig, chasch Gift drufnäh, ds nach dr Frag: „Heit dir no ds Superchärtli?“ d Suechi nach dere Schisscharte afang mau los geit. Aus hätte sie während em Astah nid fürah gnue Zyt gha, dä Cheib im Täschli, im Gäudsecku oder wo oh immer z sueche. Nei, weisch d Überraschig isch scho chuum i Wort zfasse, we de ar Coopkasse nach dr Supercard gfragt wirsch. U oh wed se zwo Minute lahsch lah nusche, heisst ds no lang ni, ds sie ds Plastigg oh finge. De heissts de aube: „Ou, die isch äuä no bim Mah im Portemonnaie, (lach).“ Gigle.
Aber ds Käthi regt sech oh uf, we d Chunde d Supercard nach es Paar Minute intensivster Suechi füre chnüble. De muess sie nämlech ihres Lächle füre näh, wo dr normau Mönsch öppe brucht, we dr Chef e Witz vrzeut, wo überhoupt nid lustig isch u derzue es „Merci“ füre drücke.
Merci für was? Ds me ihri Date darf abzügle und genau weiss, wenn ds d Rosmarie Grütter e Elviro Gwürzmischig für Fleisch- u Fischgricht chouft? Merci seit me are Coopkasse eh viu z viu, tüecht ds Käthi. „Weit dr es Seckli für d Himbeeri?“ „Ja, gärn, merci.“ „Merci öich.“ „Näht dir dr Kassezeddu?“ „Nei, merci.“ „Merci“ „Geits eso oder darfi es Seckli gäh?“ „Nei, es geit, merci“ „Merci, no e schöne Tag“ „Merci, glichfaus u uf wiederluege.“ Nei, merci, du.
Sie seits ja, viu z mängisch merci. U aus wär ds Ganze mit Supercard u merci no nid gnue, gits ono d Märggeli. Dä, wo ds Rabatt-System het erfunge chunnt im Käthi ihrere Hass-Liste grad nach em Erfinder vom Sunntisverchouf. Für aues muess es um z verrecke e Aktion gäh. Obwohu e Aktion ischs aube nume für d Chunde, wo nüt überlege, aber ds si eh die meiste. Wüu öb de itz d Dampfstation Elextrodampf, wo när einewäg nume im Wäg isch, mit Märggeli im Wärt vo 300 Stei oder ganz normau ohni Mräggeli choufsch, spiut absolut ke Roue. S chunnt sogar türer, wüu sobaud me keni Märggeli meh für öppis cha sammle, wärde die Produkt sofort abegschribe u die wos geng no nid checke choufe no grad e zwöiti Dampfstation. He, ja, für e Növö, wo itz de hüratet u für sini BEKB-Hemmli unbedingt sone Cheib brucht.
Aber gäu, studiere isch no nie d Sterchi vo de Coopchunde gsi. Ds gseht me aube oh, we e auti Grolse, wo sicher scho dr Ungergang vom römische Riich aus Pensionärin het miterläbt, am Nami vom Heiligabe, denn wo eh aui am kömmerle si, grad ganz dringend es Päckli Güetzi u ne Tomate brucht, wüu sie süsch no vorem Silvester würd dr Löffu abgäh. Öppe glich viu studiere oh die Büeble, wo Aukohou oder Zigarette wei choufe, obschon sie no nid mau dr Stimmbruch hei gha. Die probieres geng im Coop, oh we de dert sogar für nes Aukohoufreis Bier muesch dr Uswys zeige. Einewäg lieferet ds Aukohousortiment zwüsch düre öppis wo ds Käthi ufregt oder zmigscht heftig dr Chopf laht lah schüttle. Zwe gschläckti Machos mit Läderjagge u wysse Adidasschue stöh vorem Gsteu mit em Hochprozäntige u diskutiere: „Ey, Aute, nähme mr eifach e Panther Gold.“ „Nei, Mann, dsch mr letscht Mau huere verlitte.“ „Bruda, was labersch du? Däisch King. U es heisst sowieso verleide.“ „Was leide? Dini Mer het e Leide.“ Ab denn het ds Käthi nüm zueglost. Aber wahrschinlech ischs druf usegloffe, ds beidi ihrne Cousins hei aglüte.
Die Episode isch passiert, wo ds Käthi no im Chundedienst het gschaffet u zwüsch düre het Gsteu ufgfüut. Denn het sech ihre Hass uf aui Mönsche u was sie so uselöh nachhautig gfestiget. Churz vorhär het sie drum e super Phase gha u isch sogar am ne Chorbbauclub biträtte. Denn isch oh das mit em Rüggeweh no nid so schlimm gsi u sie het sech gseit, vilech sige die donners Mönsche gar nid so linggi Sieche. Aber im Chundedienst het sech ihres zwüschezytleche Höch zimmlech rassig wieder ines Töif umgwandlet, wo sider nümme ghört het. Chunnt doch da würklech sone Haubschue u fragt am 20. Oktober im voue ärnscht, wo ds d Osterhase sige, sis Gottemeitli wünsch sech eine. Ds Käthi luegt ne ah, aus hätt er grad gchauberet, rächts um kehrt gmacht u ne lah stah wie ne nasse Dampf im Chlee. Uf ere ähnleche Stufe stöh bim Käthi die, wo grad just vorem Produkt stöh u frage, wo sie ds finge. Derzue versperre sie meistens mit ihrem Wägeli ohno dr Wäg für die wos würklech pressant hei.
U we mau kene vo dene ume isch gsi hets aube ohno die gäh, wo süsch öppis stürme, wo ds Käthi bim beste Wiue nüt derfür cha: „Dir vo däm Meiländerliteigg isch am Roger imfau schlächt worde. I wetti gärn ds Gäud zrügg.“ Tamisiech, hets dere ids Hiri gschisse? Am liebste hätt ds Käthi denn gseit „Dir, wenn i öich so aluege, chani mr o ne ganz angere Grund vorsteue, wieso am Roger uf ds Mau schlächt wird.“ Aber sie het sechs de vrchlemmt u die gueti Frou a Gützifabrikant verwiese, wo ds Telefonnummero eh scho wär uf dr Packig gstange. Natürlech chunnsch aber im Chundedienst oh mit dene i Kontakt, wo immer z Biuigste sueche. Genau settigi, wo när oh vo de 10fache Superpünkt wei profitiere, obwohu scho dr ganz Chäuer mit 10fachem-Superpunkt-Mähu gfüut isch. Immer uf dr Suechi nach emne Schnäppli u mit emne Hirni wie dr Rainman, wes drum geit haargenau z wüsse wenn was wie viu biuiger isch gsi. Aber werum ds es itz nüm so isch, chöi sie sech bim beschde wiue nid erkläre. Auso frage sie. „Dir, dr Mousseamo Schoggi mit 60% Caco-Ateu isch gester no abegschribe gsi. Het sech ds gänderet?“ Lueg doch säuber nache, we di ds schwarze Züüg so intressiert, het ds Käthi dänkt und däm Typ miti Drissgi mit Schweissfläcke unger de Achsle u e chli z viu Füuig im T-Shirt wortlos dr Rabattkatalog vo dere Wuche id Finger drückt. Er het nüt gseit, sondern nume gschwitzt wie nes Söili ir Souna u mit glänzige Öigli dä Katalog dürebletteret aus wär irgendwo dert ine e Goudschatz versteckt. Wo ds passiert isch, isch ds Käthi scho lang nüm im Chorbbauclub gsi, steu dr vor, nach däm Vorfau mit em Meiländerliteigg isch sie hochkant usegfloge. Sie machi drum dr Teamgeist kaputt, hets gheisse.
Itz wei mr aber wieder zrügg zu ihre ad Kasse, wo sech mittlerwile öppe ne 20 Meter längi Schlage us Schnäpplijeger, Märggelisammler, Supercardbsitzer u tätschfeisse Familiemüettere het biudet. U genau sone Traktor vo Frou steit itz am Förderband u biget zwöi Gascho Cola-Zero druf. Bi dere nützt itz aues Zero nüt, dänkt ds Käthi u luegt zu wie dr Goof im Wägeli grad die letschte Brösmeli vo sim Weggli i sech ine stopft. Ds die huere Griessbreimarder mit ihrne vougschissne Windle oh um z verrecke immer ds Weggli scho im Wägeli müesse frässe isch am Käthi oh es Rätsu. Excüse, aber ässe chasch däm itz bim beschde Wiue nid säge, we sie sechs meh istriche aus öppis angers . Aber sie seit wieder mau nüt. Stattdesse fragt sie: „Heit dr ds Superchärtli?“ U d Suechi geit los.