top of page

Dr Dokter im Sanatorium Sankt Damian het öppis vom ne Schädubasisbruch u re schwäre Ghirnerschütterig verzeut. Sig nid z erscht mau, het er zue mr gmeint, ds sech e Maa i mim Auter sportlech übernoh heig u drum bi ihm uf em Schrage sig glandet.

Aber die Story, da müess er ehrlech si, die wärd er am einte oder angere verzeue. Derzue het er chli grinset. Aber natürlech, er wärd anonym vo mr rede, Arztgheimnis. Ds sig nid d Frag. Aber eine, wos bim Gruss an die Sonne i de Wullesocke derewää überschlaht, ds er dr Chopf am gussisige Radiator aschlöng, ds heig er itz würklech no nie ghört. Oh nid vo de Kollege us de Yoga-Hochburge. Er het sech de verabschiedet, gueti Besserig gwünscht u mi ume mim Chopfweh über lah.

 

U i ha afah studiere, wies het chönne sowyt cho. Hätti äch nach dene Yoga-Ferie mit mire Ex z Kreta genau ds gliche mit däm Sport söue mache, woni mit ihre ha gmacht? Nämlech Schluss. Nenei, es tuet äbe aube scho guet. Oder hätti äch nid umzverrecke die Gussise-Radiatore söue lah iboue? Gloubes nid, für Badtüechli z tröche, sie die geng no unübertroffe.

Nei, ds wahre Problem si d Wullesocke gsi. Mit dene hesch eifach ke Haut. Ds isch es. Mini Wullesockezyt isch abgloffe. Aber wie söui ds nume mim Grosi erkläre?

Dr Radiator

Dr Radiator -
00:0000:00
bottom of page