Zigarre het er säute groucht, viellech einisch es ugrads Mau, wenn ihm öppis bsungers guet isch glunge. Nenei, sini Marke isch Brunette Doppufiuter gsi. Syt dr Stifti.
U trotzdäm si sech die meiste einig gsi, ds e kubanischi Zigarre viu besser zu sim Uftritt hätti passt. Item. Ds hei vilech die dänkt, wo ne nume vom Gseh hei kennt. Wo nume hei gseh, ds er geng isch ume gloffe, wie dr Protagonist vom ne Mafiastreife us de 60er.
Die, wos nid besser hei gwüsst, die hei nume vom Al Capone vom Wiederbärg gredt. He ja. Mit dere Alegi, em Schwarze Zwöiteiler, dr dunkle Sunnebrüue und dr Krawatte, wo ner gluegt het, ds sie geng schön kompakt am Chrage sitzt. U när hei sie ne vilech oh zwüsch düre im Goudige Schrubstock, wenn er scho ds einte oder angere Haubeli Primitivo het abeträit gha, vilech hei sie ne denn dert aube ghört, wie ner mit sim nache gmachte italienische Akzent vo sire Zyt ar neapolitanische Küste het verzeut.
Ds einzige, wo nid ganz het passt i ds üssere Biud vom Al Capone vom Wiederbärg isch ds Töffli gsi. Mit sim achefrisierte Puch Maxi het er aube d Rotwyyfläsche vom Denner i Wiederbärg hingere bracht. Im Ahänger, schön igströit mit Strou, wo ner bi sine Nachbere im Chüngustau het entlehnt.
Sini Nachbere si de oh die letschte gsi, wo ne läbig hei gseh. Einisch am ne späte Abe isch er bi ne ir Chuchi gstange u het irgendöppis gliiret.
Am angere Morge hei ne du d Steiner Schüeler uf em Migrosbänkli gfunge. Er isch im Schlaf uf em Bänkli chli nidsi grütscht, dr Grawattechnopf zwar no kompakt, aber glich nüm ganz am Hemmlichrage.
Dr Al Capone vom Wiederbärg
