top of page

5. LIGA MATCH

Horse Power - Unknown Artist
00:0000:00

S isch ume mau Sunnti. Dr Aukohou vo letscht Nacht macht d Chnoche schwär u dr Gring no viu schwerer. Verschwumme erinnerni mi no drah wieni ids Bett bi cho: Mit uhuere schlagsite bini id ds Züüg ine gheit u aues het dräit, d Silver Star isch e Schissdräck dergäge. Aber i muess glich zum Näscht us, öbi itz wott oder ni. I hocke uf u luege uf d Matraze näb mim Bett. Dert ligt mi Suffkumpan vo geschter, dr Züchtu, trotz sire Roucherlunge e knauherte Ussepägg. I stah uf torkle id Chuchi, lah d Kaffimaschine ah u nime dr füecht Abwäschhudu wo im Brünneli ligt. Dä schiesseni am Züchtu mits id Frässe. Er grunzet chli u luegt mi ah wie ne Chue wo z erscht mau are Bong het zoge . „Was luegsch so gschisse?“ fragi ne u er seit nüt. Stattdesse steit er uf u gheit fasch ume uf d Schnurre, wüu er z glichgwicht nid sofort fingt. „Gäg wän schutte mr eigentlech hüt?“ fragt er mi u wagt sech ei zwe Schritte Richtig Chuchi. „Huttu, hani gmeint“ gibeni  zrügg u trinke afang mau es Glas Wasser uf Ex. Ds tuet guet. Aber weni mr überlege ds i zwo Stung scho bim ne 5. Liga Match sött ir Chischte stah, bruchts no chli meh Wasser ds i überhoupt dr Wäg vom Mittukreis bis i mi 16ner schaffe. Aber im Moment hani no ganz angeri Problem. Obwohu mi Körper komplett uströchnet isch, drückt mini Blase wie ne Uristier. U probier mau mit somne Druck uf eim Bei e Socke azlege. Ds bringsch nid fertig, cha drs auso säge. U de hanis haut lassy.

 

Nach em dusche bini de scho chli wacher u gseh oh einigermasse zum Gring us. Ds chame aber vo mim Compagnon nid grad bhoupte. I d chuchi het ers geng no nid gschafft u so ligt er ume uf sire Matratze wie nes Pfung Schnitz. Züchtu isch ke Morgemönsch ds weiss i, aber s isch ja mittlerwile oh 10ni gsi u so langsam sötte mr üs zwäg mache für rächzytig im Schärmä z si, wie üse Schuttplatz heisst. Obwohu, eigentlech heisst er ja itz Perskindol Arena, sit dr Vorstang het z Gfüeu gha mir müessi um z Verrecke e nöie Houptsponser ha wo nis sone schitteri Tribüni mit 50 überdachte Sitzplätz häre steut. U de si sie da uf die Saubi-Fritze cho, wo mit üsem Verein einewäg scho fei Chlüder mache, wüus geng so Globine git wo nid wei iloufe, sondern lieber e haubi Tube vo däm Gschlarg uf d Oberschänkle saube. Henu, ds Problem mit em Iloufe hani nie gha. I bi scho syt de E Juniore, auso sit i öppe 10ni bi gsi, Goalie u da bruchsch itz äuä izloufe. Entweder chunnsch gäbig ah Bau oder de isch er sowieso unhautbar. U de gniessisch gschider die geili Chischte vo so nöch aussech  da no mit ere wäutsparade dr Rügge für geng z versieche. Früecher, so mit 16ni, wär ds no ni sones Problem gsi, aber mittlerwile hani o scho e Cher ds 2 am Rügge u de muesch äbe scho chli ufpasse, was de däm Rügge so zuemuetisch. Aus Teenie heschs einewäg no gäbig ir 5. Liga. Dini Gägner hei meistens es paar Jährli meh uf em Büggu u du säuber bisch doch glich geng no zimlech taselig uf de Scheiche u chasch oh ohni Technik öppis risse. We de aber us em junge Fötzu langsam e gstangne Mah wird, verliersch ds zimlech zueverlässig u de bisch glich wie die meischte u die fählendi Technik macht sech bemerkbar. U genau wäge däm wirsch Goalie. Dr Schneuscht bini eh nie gsi u ds Schutte het mi nid wäg au dene Filigrantechniker intressiert, wo 30 Pirouette anstatt ere richtige Grätsche hei uspackt. So hani oh nie namitäg uf irgendemne freie Platz verbracht u dert ei Trick nach em angere istudiert, wo när sowieso nüt hätt bracht, we dr irgende Houzfuess sini Stolleshueh ids Wadli gchlepft hätt. I bi sho früeh zu dere Fraktion mit de Stolle übergange u ha mi geng ufgregt über die Mimosene wo nüt hei möge istecke. Anstatt emne Zidane-Libli hani mr eis vom Gattuso gwünscht u speter ds vom Oliver Kahn. Für mi isch Schutte geng e Kampf gsi, Mannschaft gäge Mannschaft u nid irgende Wettbewärb, wär itz dr Verteidiger geiler laht lah stah. Isatz, sekle solangs geit u am Schluss dräckigi Chleider, ds d Mueter däheim vor Chlupf fasch vom Stängeli gheit. U nid ds ewige wischiwaschi hinge-düre-uf-sicher-spiele-aber-de-glich-chuum-steisch-im-strafruum-e-schwaube-mache-gschmier. Viu Gou muesses gäh, öppe die oh es Foul oder ä dummi Schnurre, aber ämu immer zäme für e Sieg kämpfe. U irgendeinisch hets mi de tüecht ds Gou sig dr richtig Poschte für mi. Muesch nid geng öppis ufem Bitz desume Hüehnere u wed mau eine usem Bügu chratzisch bisch dr Heud. Aber leider stimmt ds nid geng, klar we de eine usehousch, wo itz vilech nid jede hätti gha, hei d Mitspieler scho freud, dsch klar. Aber we de irgende Bock schiessisch, wo sone Pussystürmer nume hurti d Häng verwirft u langsam zrügg jöggerlet, bisch dr Löu u ds Gou hesch sho praktisch uf sicher. U oh nach em Spiu wüsse, die meischte nume no, ds de am Gägner e Chischte pfannefertig hesch ufgleit u nüm, ds de no zwe Penautine usem Egge gchrazet hesch. Penautine si aber sowieso öppis, wo de aus Goalie muesch liebe. Nüt hesch z verliere, wenn er ine geit, ischs normau u wed ne usetuesch, bisch dr Gröscht. U sowieso, wed eine hesch ischs meistens ono e wäutsdonners Save u da freusch di no grad meh.

 

Mittlerwile isch es haubi 11i u Züchtu u i hocke im Outo für i Schärme hingere z fahre. S paar wärde sech vilech gfragt ha, wieso i mim Kolleg Züchtu säge. Nei, Zürcher heisst er nid zum Nachname, sondern Räber. Für si Spitzname gits zwo Begründige: Sini eutere hei im Wyttebach hinge ne Hundezucht, wo sie dütschi Pinscher u äntlibuecher Sennehüng züchte, wes mr rächt isch. U irgendwie het sechs ibürgeret ds meh im Wyttebach am Räber Tom Züchtu oder Züchtu Tom het gseit. Wo Züchtu när zu üs ids Dorf id Sek isch cho, het er gloub dä Name wöue hinger sech lah u het sech aune aus Tom vorgsteut. Aber irgeneinisch, wo ner nid so viu gstudiert het vorhär, isch ihm du dä legendär Satz usegrütscht, wo ihm dr Spitzname Züchtu vo Neuem und uf ne ganz angeri Art het itreit: „Weisch, i zwöi, drü Jahr bini e richtige Zuchthängst.“ Es gfungnigs Frässe für jede Spitznameerfinger u lang isch gstritte worde, wär ihm zum erschte Mau so het gseit, bis mr irgendeinisch usegfunge hei, ds sie ihm im Wyttebach scho geng so säge. Aber tatsächlech es zytli ir Oberstufe het Züchtu sis Zimmer en Art e Dräitür gha, so viu Meitschi si dert i u us.

Guet acho isch er nämlech i dere Zyt scho, mit sire Justin Bieber Frisur und em diebstahlsichere Lächle, wo sogar dr Titanic dr Ischbärg vor em Bug hätt furt gschmouze. Ds Lächle het er hüt geng no genau z gliche, aber d Frisur bringt er nüm so häre wie denn, wüu d Haar wärde bi ihm scho Mitti Zwänzgi immer weniger u hüt treit er meistens e Tschäppu vo de Carolina Panthers, emne American Footballteam, uf em Gring. Ds Cap isch aber nid nume drfür da sis immer lichter wärdnde Haar ds vrdecke, sondern behrbergt im Summer geng sini Zigarette, wüu ds Päckli i de churze Hose chum Platz het. Usserdäm zeigts für mi ono grad schön, was er für ne Spiutyp im Schutte isch. E ähnleche wie ig u so zimlech jede ir 5. Liga unge, wo houptsächlech wäg em Bier am Schluss spiut.

 

Chum si mr im Outo lüpft Züchtu sis Chäppi, nimmt es Päckli Parisienne füre, u zündet sech sis zmorge ah. Ässe het er nüt möge. „Ds chotzi dr aus gredi ufe Teppich“, het er mi gwarnt woni ihm es Ufbachbrötli ha abote. Drfür hei mr beidi öppe zwe Liter Wasser trunke u si itz einigermasse parat für dä Match wo hüt asteit. Aber öb me würklech parat isch, merksch bi üs eigentlech ersch, we de dr Trainer gsesch. Wüu dä Bärger Röschu merkt itz mit em erschte Blick, öb de hüt öppis bringsch oder ni u seits dr o zimlech diräkt. Sit urzyte isch er üse Trainer. Früecher het er aube Thun trainiert u mit ne sogar mau dr Cup gwunne. Speter im UEFA Cup si sie när nume usegheit, wüu irgendsone kolumbianische Haubschueh vo Napoli ir 90. Minute mit ere glasklare Schwaube e Penauty het useghout u aschliessend verwandlet. Churz druf isch dr Röschu bi Thun aus Trainer zrüggträtte u het bi sim Junioreverein die erschti Mannschaft überno. Dsch itz 20 Jahr här. Es Zytli hets sogar rächt guet usgseh mit dr Zuekunft vo üsem Club. Bis i d 2. Liga si mr mau ufecho u hei dr Ufstig i die interregionale Ligene nume verpasst, wüu mr zviu Strafpünkt hei gha. Denn ischs gsi, wo dr Schuttplatz Schärme churzerhang dr Name Perskindol Arena het übercho. Fasch aui im Club hei gmeint, s sig itz nume no e Frage vo dr Zyt, bis me dr Ufstieg schafft u när öppe die sogar im Wäutsche Mätsch het. Aber s isch genau dr anger Wäg gange. Nachdäm zwe drei vo de Routiniers hei gseit, sie mache itz Platz für die Junge u schüttele no chli Seniore, ischs steil d Loch ab gange. Zersch 3. när e Cher 4. U itz sit 7 Jahr 5. Liga. Dr letscht Abstieg hani sogar no säuber miterläbt, dsch mini erschti Saison im Eis gsi u mini Generation het eifach nümme dä Biss gha wo die vorhär. I säuber ha ds denn no chli miterläbt. Bi drum aus Teenager gar nid mau sone Katastrophe ir Chischte gsi u ha öppe die ir 3. oder 4. Liga müesse ushäufe, we Bähler Chrigu, dr früecher Eis Goalie u hütig Goalietrainer ume mau i de Ferie isch gsi oder sech mit em Winkuschlifer bös id Finger gschnitte het. Vo däm Team woni denn aus Büebu ha lehre kenne u während dr Juniorezyt geng zue ne ufe ha gluegt, isch aber chuum meh eine übrig.

 

Es klassischs 4-4-2 spiele mr hüt, so wie geng. Ei zentrale Mitufäudspiler chli offensiver u dise hingedran. Wie jedes Mau vor em Match gits oh hüt wieder die gliche Awisige vom Röschu. Wo ner d Trainerusbildig het gmacht, möge sie no früsch u nöi gsi si, aber sithär brucht fasch jede die gliche Floskle. „Giele, mir wei üses Spiu mache, eifach schutte, flach spiele, höch gwinne u dr Gägner nid lah mache, he.“ Wes passt, chrazt er sech de aube ar lingge Ougsbraue u seit: „S isch heiss, Manne, aber dsch für die angere genau glich u sekle möge mr ja.“ Mir Spieler wärfe üs bi däm Satz aube verstohuni Blicke zue u lächle i üs ine. Ir letschti ischs ir Meisterschaft zimlech gloffe u ds isch natürlech aus auererschts üsem Coach ufgfaue. „Züchtu, weut simer we mr hüt gwinne?“ „Röschu, du fragsch mi Sache, ke ahnig“ „Zwöit, giele, we mr hüt gwinne si mr zwöit u ds gseht doch nid nume schön us ds tönt oh guet. U dir wüsset aui, ussert em Züchtu, ds mr aus Zwöite genau so ufstige wie aus Erschte. Drum göh mr hüt vougas, aber vougas u de ligt hie sicher e Dreier dinn.“ Nach em obligatorische „Heja, giele, allez, allez, allez!“ geits use uf e Platz. Die wo vo afang ah ufem Fäud spiele, föh ah iloufe u d Ersatzspiler, wo mi sötte ischiesse, hei afang mau Pouse. Nachdäm i zwo Breitine jogget bi u chli d Arme ha dräit, wird’s mr plötzlech schlächt u i hocke hurti ir vorderschte Reihe vor Tribüne ab. „Was isch los Hudu?“ fragt mi dr Güggu u git mr es Pidon. „Geschter chli viu vrwütscht“ macheni, nime e länge Zug vor Fläsche u langsam geits scho ume besser. Eigentlech heissi ja Marco Hodu, aber irgendwie isch mau öpper uf d Idee cho, mir Hudu z säge u bi däm ischs blibe. S isch gar nid öppe abwärtend gmeint, oh we mes ufe erscht Blick chönnt vermuete. Dr Güggu het si Spitzname im Grund gno genau glich übercho wieni mine. Hahn Reto isch er touft worde u vo Hahn zu Güggu ischs itz würk ke Wäutreis meh. Sini Muetter d Ruth Hahn isch siner Zyt für die Grüene im Nationalrat gsi, bis es e gröbere Rächtsrutsch het gäh u sie d Wiederwahu verpasst het. Dr Güggu isch e liebe Cheib, genau wie sini Mer, aber irgenwie hei sie beidi chli dr Realitätsbezug verlore. Wie aui Grüene. Er isch üse Vereinspräsi het aber im Schutte öppe söfu Talent wie ne Büchse Ravioli. We me so wott isch er nume im Eis wüu er sech für e Verein immer e huere Müeh git. Er organisiert jedes Jahr d GV u macht aube bi de Juniore oh dr Linierichter, aber nume bevor ds sie id Pubertät chöme u ner nümme nache mah. Natürlech hets am Güggu nie für ne Stammplatz glängt. Aber si Kampfgeist isch bewundernswärt: Wüu wär nachdem er sech am einte Wucheend bim ne 5-Minute-Isatz praktisch i Läbensgfahr begäh het u vom Platz gschliche isch wie ne gschuttete Hung, im nächschte Training wieder topmotivert uf e Rase chunnt, brucht scho e herte Gring.

 

Wo dr Match du äntlech losgeit, chume richtig i Fahrt u bi vou im Elemänt. Scho dr erscht Agriff über Züchtus linggi Site chunnt gfährlech nach vor d Chischte, aber dr Heinz cha no grad kläre. Dr Heinz isch üse unumstrittnig Captain u eine vo dene, wo scho im Eis hei gspiut, wo no niemer je öppis vom Elvis Presley het ghört gha. Er isch e klassische Inneverteidiger, Scheiche wie Eiche, gross, breit u Ougsbraue ds sech d Stürmer scho im Mittukreis id Hose schisse. Sini Spezialität si d Standartsituatione. Auso Eggbäu, Penautine u Freistöss. I hätt no nie gseh ds dr Heinz e Penauti verschiesst. Ganz cool, entweder linggs oder rächts unge i Egge, je nachdem wo dr Goalie nid häre gumpet. Bi de Freistöss hingäge fahrt er e ganz angeri Taktik. So ab 30 Meter Distanz laht er meistens e wäutsdonners Bombe vo Schuss richtig Chischte ds sogar i wo hinger ihm stah dr Chnöischlotteri überchume, ds grad itz dr Wind so blöd chönnt dräie ds dä Brätsch am Schluss no mi preicht. E änhnlechi Wucht bringt dr Heinz aube bi sine Chopfbäu hingere Bau. Wenn aube wieder eis e wunderbari Banane i Strafruum flügt u är sini höchi Stirne a d Chugle donneret ds es bau e Überschauchlapf git. Wyt über 30gi isch er mitlerwile u nüm dr Schneuscht. Ds macht er aber mit sire Technik und em überragende Stelligsspiu locker wett.

 

S dünkt eim, kes vo beidne Teams wott dr erscht Fähler mache. Was fougt isch e zimlech taktische Match für d 5. Liga. So wies mr eigentlech gar nid gfaut. E richtige hinge-düre-uf-sicher-schutte-Match. Kene vo de Fäudspieler het im Momänt d Eier i de Hose irgendöppis azrisse. Ds geit würklech sowyt ds i nach ere Haubstung z erscht mau zure Parade zwunge wirde. Eine vo Huttu isch rächts düre broche u probiert mi mit emne Schuss i läng Egge usem Konzept z bringe. Dr Eggbau druf isch aber gar kes Problem für am Heinz sini Haubglatze. Gly druf isch es aber sowyt ds mir tätsächlech öppis i Richtig gägnerischi Chischte z stang bringe. Normalerwis verdribblet sech dr Massimo ja, aber dasmau laht er drei Verteidiger lah stah u gseht dr mitglofnig Arlind, wo nihm d Chugle sofort wieder übere schiebt. Itz müesst dr Massimo im Grund gno nume no e Körperteu nach Wahu i irgendere Art a Bau bringe u ds Gou wär Tatsach, aber itz macht er sim Ruef aui Ehr. Er nimmt d Baue nomau ah u wott no dr Goalie tünnele. Was für ne Gigu. Genau die sis, wo mir dermasse uf e Sack göh. Nid nume ds er es todsichers Gou so säubstverständlech vergit, wie d Jury aube dr Oscar. Nei, er wott ono dr Goalie lächerlech mache. Eine vo mire Gattig. U ds stosst mr suur uf. „Tue dä doch ine du huere Schwanz“, möögi ihm zue, woner wieder richtig Mittukreis jöggerlet. Er hets gloub nid ghört oder tuet zmingscht so. Jä, dä Massimo. Irgendwie geit mr fasch aues ufe Sack, woner macht. Wüu er isch äbe genau dä Spilertyp womi zur Wyysgluet cha tribe. E Egoman wie ner im Büechli steit u när ono e wehlidigi Soumoore. Vor nes paar Mönet het er im verhasste Wintertraining, Chraft u Usdur bis de chotzisch, nid chönne drbi si. U wieso? Wüu ne e Grosle im Migros mit em Rollateur übere Huufe gschnätzlet het. Dsch doch e bägguhäärige Siech so eine. Ds chani nid ärnscht näh.

 

Chli speter isch es üse Quotealbaner, dr Arlind, wo mr Freud macht. Das Mau spiut er nüm zum Massimo, sondern machts ällei. U chlepft d Chugle vom 16ner Rand mitts i Bügu. Was für ne Chischte. „Geile Topf, Arlind. Wes Gäud drfüür gieb, hättsch itz e nöie Merz“, rüefi dasmau füre. Dr Arlind zeigt mr e Duume ufe u lächlet mr zue. Er entspricht nid mängem Klische, wos über Exalbaner git, aber eis erfüllt er ganz klar. Wo ner zerscht Mau zu üs ids Training isch cho, isch sini erschti Frag nid gsi wies üs göng oder öppis i die richtig, sondern eifach es secs: „Aute, wo chame hie parkiere?“ Eigentlech wär er viu z guet für üs. Es Talent, wos nid so hüüfig git. Liechtfüessig, spieuintelligänt, technisch blitzsuber u sech oh nid z schad mau gäg hingere z schaffe. Dä chönnti lengstens 2. Liga spiele, we nid sogar no höcher. Aber wüu er dr Schwicerpass het, macht er im Moment Zivildienst bi üs ir Kita u wott wäg däm nid furt u oh wüus ihm gloub eifach gfaut bi üs. Weds nid wüsstisch, würdsch fasch nid uf d Idee cho, ds sini Vorfahre us em Kosovo chöme. Perfekts Bärndütsch und ke Spur vom ne Shippi-Slang. Ds beschte Bispiu für die glungeni Integration isch d Tatsach, ds er bim Ibürgerigstest de Type vom Amt „Dr Noah“ vom Mani Matter ohni Problem het vorgsunge. Ds sigi sowieso sis Lieblingslied vom Matter, het er mr mau vrzeut u er singts hüt no öppe die ir Garderobe. Bis zur Pouse sis no drei Minute u s gseht so us, aus würde mir dr Vorsprung i die zwöiti Haubzyt chönne rette. No ne Eggbau füre Gägner wüu dr Züchtu am gägnerische Stürmer mit ere Grätsche im hüehnerletschte Ougeblick no d Chugle vom Füessli putzt het. Fasch hätt dr Bau Schnee druffe, wo ner i Strafruum flügt so höch chunnt er. Es Gnusch vom Tüüfu vor mire Chischte. Überau Scheiche. U plötzlech ligt dr Bau hinger mir u i verstah d Wäut nüm. Wie isch ds itz gange? Gopferteli, d Füehrig hätte mr itz grad noch chli dörfe bhaute. Aber itz isch Haubzyt u ds Spiu steit 1:1. Verdient ischs scho, wüu würklech meh vo däm Grosi-Kick hei mir nid gha.

 

„Mir müesse meh, Giele“, meint dr Röschu bim Pousetee ir Kabine, „aber loufet um gottswiue nid ids offene Mässer. Heit ja gseh wie schnäu sie chöme, we mr hinge mau chli uftüe. U Massimo, spiu äntlech mau die huere Chugle, süsch nimi die use.“ „Aber Trainer, sie foule mi immer, bevor i Bau cha spiele“, meint dr Massimo u verwirft d Häng. „S tüecht mi no, eifach dr Chopf ufe ha u ds Pässli gäh, süsch chasch cho Bänkle“, macht dr Röschu u luegt ne ah ds em Massimo sini Italienereier uf d grössi vo M&M’s schrumpfe. Die zwöiti Haubzyt faht mit emne Schrei ah. Dr Pädu isch iknickt, ohni iwürkig vom ne Gägner. Wieder mau. Er isch eifach e arme Siech. Öppe vier mau pro Saison isch er verletzt. U de meistens nid ds eifache züüg, sondern meistens Bänderrisse. So gsehts o das mau us. Er humplet ämu gstützt vom Heinz vom Platz u wird düre Res ersetzt. Dr Res het mau bi Ostring United, ds Bärn ine ir 1. Liga gspiut u het bis hüt ds Gfüu ds garantier ihm e Stammplatz uf Läbzyte bi üs. Blöd für ihn, gseht ds dr Röschu nid so. Aber ufem Bänkli het dr Res guet zyt, sech geng wieder vo Neuem über üses Spiu oder ds vom Gägner ufzrege u ds säge, ds sig ir 1. Liga de scho öppis angers gsi. Bim erschte Baukontakt verstoglet er dr Bau wie dr hingerletscht Houzfuess. Aber statt ds er dr Fähler bi sich suecht, verdräit dr Res d Ouge u steut ume mau d Büez vo üsem Platzwart i frag. Aber natürlech geit dr Match trotz sim Bauverlust witer. U wüu er sini Zyt drmit het verbracht, wäg em Rase d Häng zverrüehre, louft er sim Gägner nid nache. Mir hinge in chöme bös i Seich u meh schlächt aus rächt chani e Abschluss no mit de Füscht kläre. Aber d Situation isch no nid entscherft. Geng no isch Huttu i Baubsitz u e Schlänzer verfähut ds Gou um nes Haar. Zum Glück. Nie im Läbe wäri ah dä Bau drah cho. S wär eine vor Sorte unhautbar gsi, wo ne Parade nume e blibende Rüggeschade hätt zur Foug gha. Afang mau düreschnufe u dr Abstoss guet furt bringe. Irgendwo im Mittufäud landet d Chugle u dr Gimli hout ne sech. Dr Gimli kenni scho syt Ewigkeite. Sho im Chindergarte bim Frölein Britschgi hani ne lehre kenne u sider hei mr geng ume mitenang ztüe gha. Er isch isch sho denn dr Chlinscht gsi u ds isch bis hüt eso blibe. Wäge däm oh si Spitzname. Nachdem Zwärg us Herr der Ringe. Denn mit 6i isch er sogar dermasse e Stünggu gsi ds ne ds Frlölein Britschgi öppe die het vergässe mitzeue u sie ne mau gfragt het, öb er de würklech e ganzi Banane mah. Er het möge.  Zum Erstuune vo aune Mitmönsche isch er bis hüt e chline Mäidröscher, wo mänge stämmige Bursch locker ungere Tisch frisst. Im schottische Hochland heig er einisch sogar au die iheimische Viufräss mit ere Nonchalence im ne Ässwettbewärb besiegt, ds die Gschlagne am Schluss grad so ghüselet hei gluegt wie ihri Röck. Aber obwohu er geng het möge stopfe wie ne Grosse, isch er nie würklech gwachse u isch hüt immer no wyt unger 1.70. Sekle mah ner aber. Het er geng möge. Dr Sporttag ir Schueu het dr Gimli eigentlech immer gwunne. Ämu solang die angere bim Chugustosse nid e z grosse Vorsprung hei useghout. Was dä hüt eis Kilometer abspuelet während emne Match. Äuä öppe glich viu wie aui angere 21 Spieler zäme. Im Schutte isch er niso enorm begabt, aber immerhin isch er fitter, schneuer u wändiger aus jede anger ir 5. Liga u ds bringt ihm gwautigi Vorteile.

 

Ir Zwüschezyt chunnt dr Match geng no nid würklech ids roue. Oder scho? Mou, iz, nach ere guete Stung tuet sech öppis. Dr Res verliert ume Mau e Bau u regt am Massimo, wo äntlech mau d Chugle gspiut het, au Gottschang wüescht. Dr Gimli macht sech ufe Wäg, am Stürmer dr Bau ume abzjage u beindlet ihm im ne affegaracho hinge dri. Chum het er ne überhout, wott er vo vor i Zwöikampf. Aber Züchtu mööget ihm nume zue: „Lah ne düre, hütze ne abe!“ U tatsächlech dr Gimli het zrügg u dr Züchtu saubet am Stürmer mit ere Brutalogrätsche, wo ner äuä im Militär het glehrt, hinge id Scheiche. Säute hani e Mösch so gseh flüge wie dä Spieler i däm Moment. „Da bruchsch doch scho fasch ds Flugpermis“, hani überrascht dänkt, wo ner gringsvorah im löchrige Rase landet. Es eidütigs Foul, dsch klar. Aber knapp usserhaub vom 16ner, auso haub so wiud. Dänkeni ämu zersch. Üse Schiri, wo i Fuessbauerkreise nume aus Marlboro Man bekannt isch, gsehts aber angers. Er zeigt ufe Punkt u mim Kolleg Züchtu die Roti Charte. Auso Penuti für e Gägner u mir sie e Mah weniger. Itz isch öppis los im Schärme. Ds Dotze Zueschouer, wo am Spiufäudrand steit, mööget was es usebringt, i mööge u Züchtu ersch rächt. „Schiri, was söu das? Dsch klar usserhaub gsi“, fiele mir beide dr Unparteiisch fasch im Chor ah. „Innerhaub, innerhaub“, heepet dr Marlboro Man u pfift so lut, ds es eim vorchunnt, aus hätt me e Tinnitus. Drzue leit er dr Finger uf ds Muu u sini Ougeringe luege mi ah. „Ja lug doch gneuer häre, du Gigu“, macheni liesliger u er zeigt mr die Gäubi. Marlboro Man säge mir ihm übrigens, wüu er ir Viertustung vorem Match, dere ir Pouse und dere nach dem Spiu je öppe 4 Marlboro Rot hingere chuttet u es Bier drinkt. Usserdäm gseht er us wie ne biuigi und todchranki Kopie vom Polo Hofer. Dr Züchtu stampft vom Platz u macht sech ufe Wäg zum Dusche. Aber nid ohni vorhär no dermasse eis ad Blächbande z Schutte ds sis Grosi im Wyttebach fasch es Schleudertrauma überchunnt. Ungerdesse nimmt sech dr Sächser vo Huttu d Baue u leit se sech ufem Penautipunkt z rächt. Wenn i ehrlech bi gfaut mr itz die Situation. Wie ni mau gseit ha, i ha gar nüt z verliere, mi Gägner aber so einiges. Vorauem sis Gsicht. Wär dänkt, i wüssi itz scho ganz klar, wo ds i innerhaub vo de nächschte 10 Sekunde wirde häre gumpe, dä tüscht sech schwär. Wenn i nid weiss, wo ds mini Reis gly häre geit, wie söus de dr Schütz wüsse? Rasslend wie ne auti Dampfloki blaset dr Marlboro Man i sini Pife u dr Sächser setzt sech i Bewegig. I gseh ganz genau ds er vo sich us gseh linggs atüscht auso gumpi mir nüt dir nüt i mi lingg Egge. Zwar chunnt es rächts Gschoss, aber ine geits ni. Dr Bau chani nid fescht häbe, aber er spickt irgendwo richtig Useline, wo ne eine vo mine Mitspieler unger Kontroue bringt. S isch auso ume mau voubracht. E Penauti abgwehrt u hurti husch, für nes Momäntli, dr Heud. Itz, e Haubstung vor em Abpfiff geit würklech öppis i däm Match, wo vorhär öppe so spannend isch gsi wie ne Partie Scrabble. Churz druf häscherets drum ar gägnerische Latte. Dr Heinz het e Freistoss us knapp 25 Meter i Richtig Gou donneret, aber äbe leider nume z Aluminium troffe. Aber oh bi mir, uf dr angere Site vom Platz, vor mire Chischte, passiert itz meh. Bim ne Eggbau steut mi wie geng eine zue, ds i ke Sicht meh ha u chuum meh cha ah Bau cho. „Figg di, Goalie“, seit mr dä Gigu, wo ni ihm hurti i Rügge chlemme. D Flanke chunnt aber när öppe uf d 16ner Linie, wo eine vo Huttu si Scheiche häre het. Dä, wo vor mir steit, lüpft sis einte Bei u wott dr Schuss äuä no ablänke. Für ds hani itz aber d Närve eidütig nüm und i stüpfe ihm hurti ids Wadli ds er uf e Ranze gheit. Während däm er sech bim Schiri über mi beschwärt u derfür e Gäubi Charte wäg reklamiere überchunnt, chani i eire Rueh d Chugle gah hole u dr Abstoss vorbereite. Ds hani mr ämu so vorgsteut, aber stattdesse steit dä Typ uf u zwickt mr eis zum Gring. Ds sie di Momänte wome dr Marlboro Man würklech cha bruche. Er zögeret nid lang, git ihm Rot u i ha Freud. Es blibe no zäh Minute z spiele u s gseht ganz drnah us, aus würd mr hie mit eim Punkt vom Platz gah. Da schlaht dr Arlind e Pass, wo jedem gfaut, wo je e Schuttmatsch het gluegt. Dr Güggu, wo mitlerwile im Spiu isch, chunnt oh tatsächlech ah Bau u schiesst mit ere rächte Wucht uf ds Gou. Ds er ds cha, erstuunt mi no meh, aus ds i denn dür die LAP bi cho. U dr Güggu macht würklech ds Gou. Mir chöis chuum gloube. Dr Marlboro Man äuä oh nid, wüu er pfift Offside. Itz räbelts natürlech wieder. Nie u nimmer sig ds Offside gsi, woner de si Blindhung versteckt heig u öb er überhoupt no über sini Ougeringe usegseng. S isch auso geng no 1:1 u langsam aber sicher, darf sech dr Marlboro Man uf sis Bier nach em Match fröie. Er isch gar ke Fan vo Nachspiuzyt u so sie mr schono rächt erstuunt wo ner üs ir 91. Minute no e Eggbau git. Dr Arlind bringt ne mit Zuug vor d Chischte u dert steit er. Dr Heinz. Wie me ne kennt. S chlepft schön, woner sini Haubglatz gäge d Chugle tätscht u se so i de Masche versänkt. Just mit em Gou pfift dr Schiri ab. Jawohl. Drei Pünkt im Sack u dr Sunnti glich nid volländs vertublet.

 

Wo mr id Garderobe chöme, hocket dert e füdleblutte Züchtu uf em Bänkli. Duschet het er, uf jede Fau si sini Haar nass. „Gits itz es Bier oder hei mr verlore?“, fragt er. Ja, ds Bier gits eidütig. U nid nume eis. Nach em zwöiti gspür me aube ds me Sport het gmacht, seit dr Heinz aube. U er het eidütig rächt. Hoffentlech hets morn bim ufstah u gah bügle nid scho wieder so hert wie hüt morge. Aber d Chance stöh nid so guet. We de grad uf dr Silver Star bisch gsi, wies mr letscht Nacht vorcho isch, muesch ume e Cher atsath bis de wieder drah chunnsch.

bottom of page